JVR uyon sa ideya ni Eddiegul
CEBU, Philippines - Si Talisay City Mayor Johnny De los Reyes miuyon sa ideya ni kanhi kongresista Eduardo Gullas kabahin sa pagbutang sa ikatulong taytayan gikan sa Talisay paingon ngadto sa Cordova.
“Whatever development nga makausab sa atong talan-awon, makausab sa atong trapiko ug makalipay sa katawhan, support kaayo ko ana,†matud ni De los Reyes. Si De los Reyes nagkanayon nga bisan og nagkaatbang sila ni Gullas niadtong milabay’ng election uyon siya sa ideya niini tungod kay kun mahitabo kini dili lang ang mga Talisaynon maoy makabenepisyo niini lakip na ang mga residente sa habagatang bahin sa Sugbo tungod kay dili na sila moagi sa huot kaayong trapiko sa mga karsada sa siyudad sa Sugbo, Mandaue ug Lapu-Lapu.
Matud usab sa mayor nga pila ka minuto o oras ang madaginot sa pagbiyahe kung dunay tulay sa Talisay nga magsumpay paingon ngadto sa Cordova ug pabor usab kini sa mga negosyante. Si Gullas kinsa maoy mayor sa Talisay niadtong tuig 2001-2004 ang nagplano kabahin sa katukoran sa tulay diha sa dakbayan sa Talisay diin posibleng anha kini magsukad sa barangay San Roque o sa Tanke. (BANAT NEWS)
- Latest
