PRO-7, LCPO gipasidunggan sa Crame

CEBU, Philippines - Gipasidunggan sa Camp Crame ang Police Regional Office 7 tungod sa giingong labing taas nga rating sa Performance Governance System sa tanang regional offices sa kapolisan sa nasud. Ang PRO7 nakakuha og rating nga 98.13% tungod sa giingong maayong serbisyo nga ilang nahatag sa publiko.

Ang PRO7 gihatagan og Golden Eagle Award nga maoy labing taas nga award nga mahatag sa PNP sa usa ka regional police office, mao pa hinuon kini ang labing unang higayon nga gisugdan ang pagpanghatag og award nga susama niini.

Sumala sa Executive Officer sa Directorate for Investigation and Detection Management Chief Supt. Augustus Marquez bisan bwena-mano pa kini sa PRO-7, apan taas gyud kaayo kini nga rating nga gibase sa obserbasyon sa performance sa tanang regional police offices sa nasud.

Samtang ang kapolisan sa dakbayan sa Lapu-Lapu City Police Office  pinangulohan ni Sr. Supt. Rey Lyndon Lawas nakadawat sab og Silver Eagle Award tungod sab sa gipakitang maayong trabaho sa tanang onse niini ka police stations ug gilupig ang uban pang police offices nga sakop sa PRO-7. (BANAT NEWS)