Naninda og pagkaon gipusil

CEBU, Philippines - Kritikal ang kahimtang sa usa ka tindera  og pagkaon human kini gipusil sa wala mailhing lalaki kaniadtong Sabado sa hapon didto sa Monteverde Subdivision, Barangay Lamac, Consolacion.

Ang biktima mao si Jose Hector Imperial, 34, taga sitio Santo Niño sa nahisgutang barangay samtang ang giingong nagpusil ni Imperial nagsakay og motorsiklo nga nagsul-ob og closed-type nga helmet. Ang angkas sa motorsiklo maoy giingong mipusil sa biktima.

Ang mga namusil gihulagway nga kasarangan lang ang gidak-on sa panglawas. Si PO3 Arthur Ariate sa kapolisan sa Consolacion miingon nga naglakaw lang ang biktima gikan nga naningil sa nakautang kaniya nga mga trabahante sa usa ka construction sulod sa Monteverde Subdivision dihang kini gipusil ug ang namusil dali nga miikyas.

Si Imperial kinsa nakaangkon og samad pinusilan sa tiyan daling gidala sa Eversley Child Sanitarium Hospital apan gibalhin ngadto sa Vicente Sotto Memorial Medical Center sa dakbayan sa Sugbo.                     

Nagtoo si PO3 Oriate nga dili gayud tulis ang hinungdan sa maong pagpamusil kay ang kuwarta sa biktima ug cellphone wala man kuhaa. Ang kapolisan nagpahigayon og follow-up.

Duha ka kabhang sa kalibre 45 nga bala ang napalgan sa kapolisan didto sa dapit nga nahitaboan sa pagpamusil. (BANAT NEWS)