Babaye gitiunan og gunting kay lugoson unta
CEBU, Philippines - Usa ka 28-anyos nga babaye’ng angkan gitionan og hait kaayong gunting diha sa iyang paa sa tawo nga buot unta molugos kaniya, apan ang babaye nakakita og paagi unsaon sa pag-ikyas.
Ang pagsuway paglugos ni Jennybeth Rabasto, molupyo sa Barangay Guadalupe, Carcar malampuson nga nakaikyas gikan sa suspetsado nga si Ambrosio Baran.
Base sa imbestigasyon sa kapolisan nga si Rabasto didto sulod sa ilang balay uban sa duha niya ka anak dihang kalit lang miabot si Baran nga nagpuyo gihapon sa sama nga barangay.
Si Baran matud pa mipugos pagsulod sa balay ug gitionan sa gunting ang paa sa biktima.
Matud pa nga samtang gitionan og gunting ni Baran ang paa ni Rabasto iyang gimandoan ang babaye nga hukason ang gisul-ob niya nga short pants.
Apan gilansisan ni Rabasto si Baran nga mamalhin sila og lain nga lugar aron sila makahigayon pag-ayo ug misugot usab ang suspetsado.
Dihang paingon na silang mogawas sa balay kunohay mamalhin ngadto sa laing lugar nga adto sila mag-esmeringhoy, abtik nga mikaratil pagdagan si Rabasto ug nangayo’g panabang sa iyang mga silingan.
Si Baran nasikop sa mga tanod sa Barangay Guadalupe nga miresponde sa alarma ug si Baran gitugyan dayon ngadto sa mga polis. (BANAT NEWS)
- Latest
