National Clearance System gitinguha

CEBU, Philippines - Gitinguha sa kapolisan ang usa ka national clearance system aron sa paghatag og kasayon sa katawhan paglukat og police clearance sa bisan pa og atoa ang nagkuha niini sa Sulu didto sa Aparri.

Ang Executive Officer sa Directorate for Investigation and Detection Management Chief Supt. Augustus Marquez nagkanayon nga kun madayon kini sayon na lang unya sa katawhan ang paglukat og clearance pinaagi sa maong plano.

Matud ni Marquez nga ang maong plano posibli nga mapatuman sa tunga-tungang bahin niining tuiga.

Dugang pa ni Marquez nga sa sistema karon kinahanglan gyud nga mouli sa iyang lungsod ang usa ka tawo aron lang makakuha og police clearance apan hasol kini kaayo ilabi na niadtong mga aplikante og trabaho sa lagyong lugar.

Kinahanglan lang og internet connection ang kapolisan aron makahatag sa maong clearance, pinaagi sa internet mag-usa ang tanang police stations og data.

Miingon si Marquez nga dunay duha na unya ka klase nga clearance nga ilang ihatag ang level one ug level two nga clearance.

 Ang level one clearance mao kadtong clearance nga ihatag sa mga tawo nga walay pending kaso nga giatubang.  Ang level two mao ang paghatag og clearance nga ang usa ka tawo wala gyuy kaso nga giatubang bisan pa man sa nanglabay nga panahon. (BANAT NEWS)