Ferryboat nga may 300 ka pasahero naaberya

CEBU, Philippines - Luwas ra ang kapin sa 300 ka pasahero sa barko sa Jomalia Shipping nga MV Mika Mari 3 nga napagngan og makina human nakasugat og engine problem duha ka oras  gikan pagbiya sa pantalan sa Camotes pasado kagahapon sa hapon.

Matud ni Seaman Second Class (SN2) Jomar Veloso sa coast guard nga nahinabi sa Banat News nga nakasugat og problema sa iyang makina ang maong barko ug gi-rescue hinuon dayon sila sa kauban nilang barko nga Mika Mari 5. Matud pa ni Veloso nga “side-towing” ang gibuhat sa Mika Mari 5 ug nakadunggo ra gyud kini sa pantalan sa Danao kagahapon sa hapon.   Si Arnold Teodoro, pasahero sa barko, nga nahinabi sa Banat News miingon nga duha ka oras sukad sa ilang paggikan nakadungog siya og kusog nga tingog gikan sa ilawom nga bahin sa barko.

Matud ni Teodoro nga mura og naay nangatagak nga puthaw sa ilawom ug paglabay sa 20-minutos gipahibalo sila sa kapitan nga ilang susihon ang makina ug pagkahuman gipahibalo silang apason sila sa laing barko kay di na sila makadagan. Hinuon luwas ra ang tanang pasahero sumala pa ni Teodoro. (BANAT NEWS)