Minero nga natabunan naugkat na
CEBU, Philippines - Naugkat na ang patay nga lawas sa minero nga na-trap sa Seri Mining Corporation sa barangay Dungga sa dakbayan sa Danao sa alas 8:45 kagahapon sa buntag.
Ang na-trap naila nga si Jose Melvin Landero, 22, molupyo sa maong lugar.
Si SPO4 Aresteo Espina nga nahinabi sa Banat News nagkanayon nga pasado alas 8:00 kagahapon sa buntag nakuha ang lawas ni Landero. Ang mga kauban niining minero way katulganay sa pagkuha sa lawas ni Landero gikan sa gibanabanang 400 ka metros nga giladmong lungag. Tulo ka minero usab ang nangaangol nga sila si Marvin Malabago, Cidro Bakang, ug usa ka Ranel Villanueva, nga pulos nalandig sa Vicente Sotto Memorial Medical Center.
Ang ubang mga minero nga gikahinabi sa mga tigbalita mibutyag nga gisuwayan unta nila pagtabang si Landero nga makagawas apan naabtan kini sa paghugno sa yuta dihang nangabali ang mga kahoy nga gipangtukod sa lungag.
Sumala pa nga dunay 14 ka minero sa sulod dihang nalusno ang lungag apan 13 lang ang nakagawas. Si Malabago misuway unta og bira ni Landero apan matud pa miinsister kini nga biyaan na lang siya kay makapalangay siya sa ilang pag-ikyas.
Ang Department of Energy mipagawas na og suspension sa operasyon sa maong minahan samtang nagpahigayon og imbestigasyon sa maong aksidente. (BANAT NEWS)
- Latest
