Wa mangayo og sorry gidunggab patay

CEBU, Philippines - Lalaki nga nagkalalis ug sa usa ka babaye didto sa Barangay Odlot, dakbayan sa Bogo gidunggab patay sa bana sa maong babaye kay nagdumili kini pagpangayo’g pasaylo.

Ang biktima naila nga si Aldrin Nadado, 18, molupyo sa nahisgutang barangay samtang ang suspetsado mao si Dandy Roxas, 37, mananagat nga silingan ra sab sa biktima.

Base sa imbestigasyon sa kapolisan nga ang biktima ug ang asawa sa suspetsado nagkalalis niadtong tungora.

Si Roxas giingong hubog ug pagkakita nga gikaaway sa iyang asawa si Nadado diretso kining mikuha og kutsilyo ug gidunggab ang biktima sa makadaghang higayon.

Ang biktima gidala sa Cebu Provincial Hospital-Bogo City apan patay na kini.

Matud ni PO3 Jim Fusvilla nga ang suspetsado mitug-an nga wala siya makapugong sa iyang gibati dihang nagmagahi si Nadado pagpangayo og pasaylo sa iyang asawa.

Wala hinuon modagan ang suspek ug gipaabot ang mga polis sa ilang balay. Ang suspek gipasakaan na og kasong murder niadtong Biyernes sa hapon. Sa laing bahin, napalgan na lang nga wala nay kinabuhi ang usa ka mananagat nga dili makamaong molangoy nga magbalhin unta sa iyang pumpboat didto sa sitio Timbaon, Barangay Silion, lungsod sa Bantayan pasado alas 2:00 sa miaging hapon.

Ang patay nang nakit-an mao si Joel Almohallas, 41, mananagat, apan wala kini mabalik sa ilang balay hangtod sa sunod adlaw.

Si Jeremias Giducos, 41, molupyo sa sitio Pooc sa samang barangay maoy nakakita ni Almohallas nga naglutaw na sa dagat. Ang municipal health officer nga si Dr. Liza Rivera sa Bantayan miingon nga nalumos si Almohallas. Sumala pa sa imbestigasyon, dili kaayo makamaong molangoy si Almohallas. - /EIM (BANAT NEWS)