Fire prevention month gisugat og sunog

CEBU, Philippines - Gisugat og sunod-sunod nga sunog ang pagbukas sa Fire Prevention Month kagahapong adlawa ug gibanabana nga mokapin dayon sa usa ka milyon ka pesos ang danyos sa maong sunog.

Lima ka oras sa wala pa magsugod ang mga programa alang sa Fire Prevention Month nga gipasiugdahan sa Bureau of Fire Protection-7 miulbo ang usa ka sunog sa barangay Daan-Tabogon sa lungsod sa Tabogon.

Naugdaw ang balay ni Severina Gonzaga, 85, ug base sa imbestigasyon ang sunog diha gyud manukad sa kwarto  ni Gonzaga.

Gibana-bana nga mokabat sa P750 mil ang danyos sa maong sunog ug walay naangol sa maong hitabo.

Samtang nasunog ang usa ka Mitsubishi Adventure nga gipanag-iya ni Perly Antiola unahan sa South Road Properties.

Base sa imbestigasyon sa kabomberohan gikan sa Talisay si  Antiola   padulong sa dakbayan sa Sugbo apan pag-abot sa nahitaboan miulbo ang kalayo duol sa manobela sa maong sakyanan.

Daling migawas sa sakyanan si Antiola ug mitawag sa kabomberohan ug daling napawong ang kalayo.  Gidudahan nga depektoso ang electrical system sa maong sakyanan ug maoy nakaingon sa maong sunog.

Samtang pasado ala-una kagahapon sa hapon, nakadawat na sab og laing alarma sa sunog ang Cebu City Fire Station sa sitio Pangpang, Andres Abellana Extension, barangay Guadalupe sa dakbayan sa Sugbo.

Ang sunog didto nagsugod sa balay nga gipanag-iya ni George Dela Calzada. Hinuon nadeklarar kini dayon nga under control sulod lamang sa singko minutos human gitabangan sa mga residente pagbubo og tubig. Matud pa nga dunay mi-spark nga electrical outlet sud sa maong panimalay.

Sa laing bahin, ang kabomberohan  mipahigayon og motorkada kagahapon sa buntag nga nanukad sa ilang buhatan  sa Natalio Bacalso Avenue padung sa V. Rama Avenue dayon sa Fuente Rotunda balik sa opisina sa  BFP-7.

Gitambongan kini sa nagkadaiyang mga fire sub-stations ug fire volunteers sa siyudad.

Ang tema karong tuiga mao ang “Isulong ang Kaunlaran, Sunog ay Iwasan, Kaalaman at Pag-iingat ang Kailangan.”Ang BFP nag-andam og daghang   kalihokan alang sa fire prevention campaigns.

Sa Talisay City, ang kabomberohan mipahigayon og “Walk for Fire Safety” sugod sa alas-6 sa buntag nga gipangulohan ni Talisay City Fire Marshal Randy Mendaros.

Si Mendaros nga nahinabi sa Banat News mibutyag nga gikuyogan sila sa kapolisan, mga estudyante sa University of Cebu  ug pipila ka mga kawani sa city hall. - /EIM (BANAT NEWS)