Magpataka’g labay’g basura prisohon

CEBU, Philippines - Si Talisay City Mayor Johnny De los Reyes mimando pagsikop sa mga magpataka og labay og basura diha sa palibot sa merkado publiko sa Tabunok. Giluwatan ni Delos Reyes ang kamanduan human nga nabarado tungod sa mga basura ang kanal sa maong merkado ug nakaamong pa sa kinabuhi sa manag-agaw nga sila si Romeo ug Brendon Cabanes nga maoy gipalimpyo sa baradong imburnal. Ang mga sakop sa Market Task Force maoy gisangonan sa mayor sa pagsikop sa mga magpataka og labay og basura ug mibahad ang mayor nga patilawon gyud og priso kadtong dili makabayad sa multa. Ang mayor nanawagan usab kini sa katawhan nga tarongon sa paghipos ang ilang mga basura aron dili kini magpasad ug maanod sa mga manhole ug kanal sa siyudad.

Kahinumduman nga ang mga mamalitay sa merkado sa Tabunok ug mga vendor taud-taud nga nag-antos sa baho kaayong tubig sa baradong kanal sa maong merkado. (BANAT NEWS)