3 ka babaye gipamusil

CEBU, Philippines - Tulo ka babaye ang gipamusil sa managlahing insidente sa dakbayan sa Sugbo sa miaging adlaw, usa kanila namatay.

Ang namatay naila nga si Melanil Pedrosa, 37, taga Lutaw-lutaw, Barangay Sto. Niño, dakbayan sa Sugbo.

Base sa imbestigasyon sa kapolisan nga ang biktima gikan sa internet café kuyog sa iyang inahan kagahapon sa kaadlawon.

Apan dihang migawas kini sa internetan gipusil kini sa tawo nga wala pa mailhi.

Daling gidala ang biktima sa Cebu City Medical Center (CCMC) apan gideklarar kini nga dead on arrival. Padayon pa ang kapolisan pagsusi sa motibo sa maong pagpatay.

Samtang duha ka babaye ang gipamusil sa usa ka lalaki nga negosyante sulod sa sakyanan kagahapon sa kaadlawon didto sa Barangay Mambaling ning siyudad.

Ang biktima naila nga sila si Margie Cedeño, 30, ug Amy Basalo, 34, taga Barangay Langtad, dakbayan sa Naga.

Giila sa duha ka biktima ang namusil kanila nga mao si Carlos Estrada, 51, taga barangay Quiot ning dakbayan.

Base sa imbestigasyon sa kapolisan nga padulong unta ihatod sa suspek ang duha ka biktima sa Naga sakay sa iyang Isuzu Trooper.

Apan naglalis ang suspek ug si Cedeño sulod sa sakyanan ug misangpot sa pagpusil.

Naigo ang walang tampihak ug wala nga kamot ni Cedeño samtang si Basalo misuway unta sa pagpakgang sa suspek apan giapil kini pagpusil sa tuo gihapon nga tampihak.

Gibiyaan sa suspek ang duha sa kilid sa dalan sa Barangay Mambaling ug misutoy og padagan palayo. Ang mga estambay nga nakakita sa duha daling midala kanila sa tambalanan.

Pipila ka minutos ang milabay napalgan ang usa ka Isuzu Trooper nga may plakang GPU-291 nga gibiyaan didto sa Sitio Avocado, Barangay Mambaling.

Ang maong sakyanan giturn-over na ngadto sa Crime Scene Investigation Unit  (CSIU) sa Camp Sotero Cabahug. (BANAT NEWS)