Dengue mikunhod sa Enero ug Pebrero

CEBU, Philippines - Mikunhod ang mga kaso sa dengue sa tibuok Central Visayas sa Enero ug Pebrero karong tuiga itandi sa sama nga termino kaniadtong miaging tuig.

Ang rekord sa Regional Epidemiology Statistics and Surveillance Unit (RESSU)-7 nagpakita nga aduna la’y 501 ka kaso sa dengue sa unang duha ka buwan karong tuiga kun itandi sa 3,512 sa tuig 2013.

Apan si Regional Epidemiologist Renan Cimafranca miingon nga mentras mikunhod ang mga kaso sa dengue karong tuiga adunay duha ka bata ang namatay.

Ang mga namatay sa dengue taga dakbayan sa Bais ug Dumaguete nga kabahin sa Negros Oriental.

Base sa talaan, ang dakbayan sa Sugbo nagpabilin nga maoy labing daghan og kaso sa dengue sa tanang mga dakbayan sa Central Visayas.

Ang hinungdan mao nga sa tanang dakbayan sa rehiyon ang dakbayan sa Sugbo maoy labing daghan og mga mulopyo.

Sa unang duha ka buwan, ang dakbayan sa Sugbo adunay 91 ka kaso sa dengue, gisundan sa Lapu-Lapu, 78; Dumaguete, 71; Sibulan, Negros Oriental, 28; Minglanilla, 24; Gihulngan, Negros Oriental, 20; Talisay,15; Tanjay, 9; ug ang Balamban ug Carcar ta’g walo ka kaso.

Matud ni Cimafranca nga ang padayong pag-awhag sa Department of Health (DOH) nga manglimpyo g’yud sa palibot ug ang grabeng kainit tungod sa El Niño nakatabang pagminus sa dengue.

Si Cimafranca mipasabot nga tungod sa kainit sa panahon nauga ang mga lim-aw sa tubig nga pundohan ug itloganan sa mga lamok nga magdala og sakit nga dengue.

Apan matud ni Cimafranca nga dili gihapon angay nga mokompyansa ang katawhan.  (BANAT NEWS)