Konsehal nangulata gikiha

CEBU, Philippines - Usa ka barangay konsehal sa lungsod sa Balamban nag-atubang karon og tulo ka sumbong sa Cebu Provincial Prosecutor’s Office tungod kay gipasanginlang midagmal og tawo nga nanghinol og duha ka menor de-edad.

Ang gipasakaan og kaso mao si Alfonso Buot Jr., konsehal sa Barangay Baliwagan, Balamban.

Ang gipasaka nga mga kaso batok ni Buot mao ang kidnapping and serious illegal detention, less serious physical injuries ug grave threats.

Ang reklamo batok sa konsehal gipasaka sa usa ka 27-anyos nga biktima nga ang ngalan gipugngan lang sa Banat News kay matud sa kapolisan gitoohan nga adunay gamay’ng problema sa iyang pangisip.

Si SPO1 Jose Ranielito Villarino sa Balamban Police Station mitug-an nga ang mireklamo nga gibun-og sa konsehal gipasanginlan ‘sab nga miabuso sa duha ka bata niyang ig-agaw nga iyang gihuboan ug gihikap ang pribado’ng parte sa ilang kalawasan.

Matud sa polis nga sa hapit na tungang gabii kaniadtong Pebrero 20 ang duha ka menor de-edad nga ig-agaw ra sa mireklamo nangatulog didto sa ilang kwarto apan sila kalit lang gipanghuboan.  Nahibaw-an sa kapolisan nga ang 27-anyos nga mireklamo nga gibun-og sa konsehal gikataho nga mihikap-hikap sa pribadong parte sa lawas sa batang babaye.

Apan dihang mihilak ang batang babaye, ang tawo mitapon na usab ngadto sa bata nga lalaki. Dihang nahigmata ang bata’ng lalaki ug mihilak, midali pagdagan ang mapahimuslanon.

Matud pa nga pagka- buntag, adunay nakataho ngadto ni Konsehal Buot sa gihimo sa mao’ng tawo. Ang konsehal miadto sa gipuy-an sa maong tawo ug matud pa gipasakay kini sa motor ug gidala sa ilang balay.

Sigun sa reklamo nga gipasaka didto sa piskaliya nagkanayon nga ang maong tawo gidagmalan sa konsehal sa barangay pinaagi sa pagbunal og kawayan mao nga nakaangkon siya og samad ug bun-og sa kalawasan.

Matud pa nga kun wala pa ang tanod nga si Dante Tojeno nga mihangyo sa konsehal nga undangan na’g dagmal ang tawo, dugang kadaut pa ang nahiaguman.

Namasangil pa ang maong tawo nga gitionan siya’g armas sa konsehal.

Ang piskaliya gipaabot nga mopatubag na sa konsehal sa pasangil batok kaniya.  (BANAT NEWS)