Way death threat si Archival

CEBU, Philippines - Way death threat nga nadawat sa iyang cellphone si Atty. Noel Archival kinsa gi-ambus patay lakip na ang iyang duha ka sakop, sumala pa sa tigpamaba sa Special Investigation Task Group nga si Supt. Renato Malazarte. Sa 24-Oras sa GMA-Cebu kagahapon, si Malazarte mibutyag nga way nakitang mga text messages sa cellphone ni Archival human mahiling sa digital forensics sa kapolisan. Apan sa linain nga pakighinabi, nangangkon si Malazarte nga “duol” na sila sa kasulbaran sa maong kaso.

Sa pagkakaron padayon pa nilang gipangita ang mga sakyanan nga nakuhaan og footage sa closed-circuit television (CCTV) nga gituohang gigamit sa pag-ambus diha sa barangay Coro, Dalaguete.

 Sumala pa ni Malazarte nga base sa pamahayag ni Paulo Cortez, ang kauban ni Archival nga buhi, daku ang iyang pagtoo nga kadtong tawo nga nagsunod-sunod kanila gikan sa korte sa Dumaguete usa g’yud sa mi-ambush kanila.

“Paglingi niya diha na ang sakyanan gitaparan sila, iya na lang nakit-an ang sumbohan sa armas unya pagkaigo niya mitago siya, dali ra kaayo ang ambush,” dugang ni Malazarte.

Dihang naigo ang iyang walang kamot ni Cortes, dali siya nga mihupo. Patay diha-diha si Archival ug kaubang sila si Candido Miñoza ug ang drayber nga si Alejandro Jayme.

Nagpabiling “job related” ang gituohan sa kapolisan nga motibo sa maong pagpatay. (BANAT NEWS)