Scholar gi-rape sa langyaw

CEBU, Philippines - Gidakop sa kapolisan sa dakbayan sa Toledo ang usa ka Australian national nga gipasanginlan nga milugos sa 17-anyos nga babaye nga iyang gigastohan pagpa-eskwela.

Ang langyaw, nga gipugngan lang sa Banat News ang ngalan, gitanggong na karon sa bilanggoan sa Toledo City Police Station samtang giandam na sa kapolisan ang kaso nga ipasaka batok kaniya.

Ang biktima mitug-an sa kapolisan nga gilugos siya sa langyaw kaniadtong Pebrero 23, karong tuiga ug mousab na usab unta og lugos kaniya kagahapon sa buntag.

Si PO1 Diomelen Abarquez sa operations branch sa Cebu Provincial Police Office (CPPO) nga nahinabi sa Banat News miingon nga base sa taho nga ilang nadawat gikan sa Toledo City Police, ang 60-anyos nga suspek nag-abang og balay sa dakbayan sa Toledo.

Sumala pa ni Abarquez nga ang biktima nga lumad nga taga Negros Oriental mi-report sa kapolisan sa dakbayan sa Toledo pasado alas 3:00 kagahapon sa hapon.

Matud sa biktima nga gisulayan na usab unta siya’g lugos sa langyaw kagahapon sa alas 5:00 sa buntag didto sa balay sa suspek diin usab siya magpuyo isip caretaker samtang gipapaeskuyla siya sa langyaw.

Ang biktima mibutyag nga dili lang kagahapon ang unang higayon nga gibuhatan siya og malaw-ay sa langyaw. Iyang gibutyag nga niadtong Domingo sa buntag milampos gyud kini paglugos kaniya apan wala lang siya mosumbong.

Si SPO4 Carmelito Hornales, desk officer sa Toledo City Police Station, mitug-an sa Banat News nga ang suspek didto ra nila nadakpan sa balay nga iyang gipuy-an.

Si SPO2 Liza Maquidato sa Women’s Desk miingon nga base sa pamahayag sa biktima didto usab nahitabo ang pagpanglugos sulod sa balay sa langyaw.

Karong adlawa pasakaan nila og kasong pagpanglugos ug attempted rape ang langyaw.  (BANAT NEWS)