LTO direktor mipasalig paspasan ang pagpanakop

CEBU, Philippines - Ang regional direktor sa Land Transportation Office (LTO) nga si Arnel Tancinco mipasalig nga karong sunod buwan iyang pahingusgan ang pagpanakop sa mga drayber og mga sakyanan nga wala’y plate numbers.

Nabantayan sa Banat News Manobela nga midaghan na karon pag-ayo ang mga sakyanan, ilabi na ang mga motorsiklo, nga wala’y plaka sa luyo apan gipasagdan lang sa mga traffic enforcers.

Ang Republic Act 4136, ang Transportation and Traffic Code, naglatid nga ang tanang sakyanan nga magdagan sa karsada kinahanglan nga aduna g’yuy plate numbers.

Apan ang ubang mga motorista tuyoon g’yud nila nga tangtangon ang plate numbers sa sakyanan, o kaha tagoan aron lisud kini nga makita kun magdagan.

Kagahapon lang, usa ka itum nga motorsiklo nga giparada daplin sa Imus Road sakop sa Barangay Lorega-San Miguel walay plate numbers nga makita sa luyong bahin.

Gawas nga walay plate numbers, ang mao nga motorsiklo wala ‘say side mirrors. Kun ang mga tinugyanan sa balaod paspas pa sa ilang pagpanakop sa mga ingon niini nga sakyanan, mahadlok unta ang mga tag-iya sa paglapas sa balaod.

Matud ni Tancinco nga aduna pa’y nagsingabot nga paglahugay sa mga kawani sa iyang opisina. Ang mga sakop sa LTO wala na makit-i nga mipahigayon og pagpanakop sa milabay’ng mga buwan.   (BANAT NEWS)