Pagbantay sa sunog!

CEBU, Philippines - Ang mga sakop sa Bureau of Fire Protection (BFP) sa tibook nasud dungan nga magsaulog sa Fire Prevention Month sugod unya sa Marso 1. Ang mata’g fire stations, apil dinhi sa mga dakbayan ug kalungsoran sa Sugbo adunay giandam nga mga kalihukan isip kabahin sa pagsaulog sa Fire Prevention Month. Sa dakbayan sa Lapu-Lapu, si Fire Marshall Oscar Mayol mopahigayon og lainlaing programa nga maglakip sa pagsuroy sa mga barangay aron edukahon ang katawhan unsaon paglikay ang sunog.

Ang imbestigador sa kabomberohan sa Lapu-Lapu nga si SFO1 Atelano Beredo miingon nga ilang sugdan ang kasaulogan pinaagi sa usa ka misa alas 5:30 ang takna sa buntag. Dayon sundan kini sa usa ka fun walk nga pagasalmotan sa mga sakop sa kabomberohan nga naglakip na sa mga sakop sa ilang substation sa Marigondon ug Barangay Babag. 

Ang fun walk adto manukad sa Dalan Punta Rizal sa Barangay Pajo nga maoy magsilbi nga assembly area ug dayon manlakaw sila paingon sa ilang headquarters sa barangay Gun-ob. Ang mga fire trucks magsunod sa mga bombero diin ilang patingugon ang mga siren aron magpahibalo kini sa katawhan sa pagsugod na sa Fire Prevention Month.

Ang mayor sa Lapu-Lapu nga si Paz Radaza dapiton sa kabomberohan aron mohatag og mensahe ngadto kanila’ng mga bombero ug sa tanang katawhan.

Dinhi sa dakbayan sa Sugbo, gikatakda usab ang pagpatrolya sa mga trak sa bombero sa lainlaing kabarangayan nga ubos sa tagsa-tagsa nila ka teritoryo.

Ang mga bombero sa dakbayan sa Sugbo gikatakda usab nga mopakita sa ilang abilidad kabahin sa pag-ambak gikan sa taas nga idipisyo kun kini gikinahanglan, ilabi na ang pagluwas og mga tawo gikan sa nasunogan. (BANAT NEWS)