Duha ka patay napalgan

CEBU, Philippines - Duha ka tawo, apil ang usa ka Swedish national, napalgang patay na sa buwag nga mga dapit  nga ilang gipuy-an didto sa Barangay Quiot, dakbayan sa Sugbo ug sa Barangay Tabok, dakbayan sa Mandaue.

Ang mga namatay mao ang Swedish national nga si Lars-Olof Bjur, lumad nga taga Kiruna, Sweden ug si Arnel Lupo, 28, ulitawo nga lumad sa Barangay Cogon, Compostela.

Base sa imbistigasyon sa kapolisan walay binuang ang kamatayon sa Swedish national.

Ang caretaker sa apartment nga gipuy-an sa langyaw manglimpyo na unta apan iyang nabantayan nga nagsiga pa ang mga suga sa kwarto ug sa sala ug nag-andar pa ang TV set.

Napalgan na lang nga naghigda ang langyaw ibabaw sa iyang kama nga wala nay kinabuhi.

Matud pa nga ang langyaw daan na nga nagreklamo nga sakit sa iyang tangkugo ug gani gitambagan nila kini nga magpahiling og doktor.

Adunay kwarta ang langyaw nga P1, 870 diha sa iyang bulsa ug walay nangahanaw sa iyang mga butang mao nga nagtoo sila nga walay binuang sa iyang kamatayon.

Samtang adunay panultihon nga ang subra nga pag-inum og ilimnong makahubog dili gayud magbunga og kaayohan sa lawas.

Si Lupo, 28, ulitawo ug lumad nga taga Barangay Cogon, Compostela napalgan na lang nga patay na sulod sa iyang gipuy-an nga kwarto sa balay ni Jonathan Praca didto sa Barangay Tabok, Mandaue.

Matud sa kapolisan nga si Praca maoy mipahibalo kanila nga si Lupo namatay didto sa iyang panimalay kaniadtong Domingo.

Si SPO3 Marcos Noval Jr. sa Investigation Detection and Management Bureau (IDMB) sa Mandaue City Police Office (MCPO) miingon nga nag-inom si Lupo ug ang iyang mga higala.

Tungod sa daghan na nga nainom si Lupo nakatulog mao nga gibiyaan siya nga nag-inusara sa iyang gipuy-an.

Matud ni SPO3 Noval nga pahimoan nila og post mortem examination ang patay’ng lawas ni Lupo aron masuta kun aduna ba’y binuang sa iyang kamatayon.  (/RUB)(BANAT NEWS)