CCMC gisugdan na og demolish
CEBU, Philippines - Gisugdan na ang pagguba sa Cebu City Medical Center (CCMC) building kagahapon kay gusto ni Mayor Michael Rama nga matukod na usab ang bag-ong ospital sa dakbayan sa Sugbo.
Duha ka dagko nga backhoe gikan sa Department of Engineering and Public Works (DEPW) maoy mihimo og pasiuna nga pagbungkag sa semento nga atop sa lobby sa 40-anyos na nga CCMC building. Si Assistant City Engineer June Nadine Sison miingon nga gibana-bana nila nga molungtad og duha ngadto sa tulo ka buwan usa makompleto ang pagguba sa CCMC.
Gitataw ni Engr. Sison nga huyang na g’yud ang CCMC human kini makasinati og grabe nga pagtay-og sa linog kaniadtong Oktubre 15. Ang mga engineer sa Commission on Audit (COA) apil nga mihimo’g pakisusi sa CCMC ug sila mihatag og pagtugot nga ipaguba na ang karaang ospital.
Sa wala pa sugdi ang demolition sa CCMC, si Mayor Rama midiskurso ug miingon nga tinguha niya nga matukod ang mas daku pa nga gitawag niya og “People’s hospital†nga makadawat og 1,000 ka pasyente.
Apan ang problema mao nga kuwang og kwarta ang dakbayan sa Sugbo aron ipatukod og bag-o ug daku nga ospital tungod kay daghan man usab kini og laing gastohanan.
Matud ni Mayor Rama nga wala niya gikauwaw nga adunay uban nga misaway sa iyang gihimo nga pagpakilimos pinaagi sa paglusad og “Peso Mo, Ospital Ko†fund campaign aron makatigum og kwarta nga idugang sa pagpatukod og ospital. Giswerte si Mayor Rama kagahapon kay miabot didto sa nahimutangan sa CCMC ang founder ug tsirman sa CFI Cooperative nga si Retired Judge Esperanza Fiel Garcia ug midonar og P1 milyon aron itabang sa pagpatukod og bag-ong ospital.
Si Judge Garcia, asawa ni kanhi Gobernador Pablo Garcia ug inahan ni Kongresista Gwen Garcia. Matud ni Judge Garcia nga nahukman sa kadagkoan sa CFI Cooperative nga tabangan ang CCMC kay 30,000 sa ilang mga sakop taga dakbayan sa Sugbo. Pagka karon miabot pa lang og kapin sa P12 milyones ang mga donasyon nga natigum alang sa pagpatukod og bag-ong CCMC. (BANAT NEWS)
- Latest
