Congressional inquiry dili makalangan sa airport terminal project – Del Mar

CEBU, Philippines - Si Kongresista Raul V. Del Mar miingon nga ang pagpahigayon og congressional inquiry aron pagsuta kun tinuod ba ang pasangil batok sa “highest financial bidder” sa pagtukod og bag-ong terminal building sa Mactan-Cebu International Airport wala gitumong aron paglangay sa proyekto.

Matud ni Del Mar nga sukwahi sa gikabalak-an nga ang pagpahigayon og congressional inquiry makalangan sa proyekto, makatabang hinoon kini aron mopaspas ang pagkaresolbar sa isyu diin ang highest financial bidder gikwestyon ang iyang kapasidad sa pagdumala og airport.

Si Del Mar ug ang ubang Sugboanong kongresista miduso og resolusyon sa kongreso nga nag-awhag sa mga sakop sa House Committee on Transportation nga sutaon ang pangangkon sa Filinvest-Changi Airport nga ang highest financial bidder nga mao ang GMR-Megawide Consortium dili maayo og rekord sa pagdumala nila og airport didto sa New Delhi ug Maldives, India.

Ang gikabalak-an ni Del Mar nga kun dili dayon maresolbar kining mao nga isyu hayan nga moabot kini sa hukmanan ug mosamot nga malangan ang pagkab-ot og kasulbaran.

Gipasabot ni Del Mar nga ang kaso nga masang-at sa hukmanan sagad molungtad og katuigan mao nga gusto nila nga mga Sugboanong kongresista nga pinaagi sa congressional inquiry madali ra ang pagsulbad sa isyu.

Matud ni Del Mar nga hangtud karon wala pa’y naproklamar nga mananaug sa bidding ang mga sakop sa Bids and Awards Committee (BAC) sa Department of Transportation and Communication (DOTC).

Atol unya sa congressional inquiry, ang kadagkoan sa GMR-Megawide Consortium ug Filinvest-Changi Airport, ingon man ang kadagkoan sa Mactan Cebu International Airport ilang ipatawag aron maklaro kining mao nga isyu.

Ang Filinvest-Changi Airport maoy ikaduha nga highest financial bidder sa P17 bilyones nga proyekto. Ang makadaug niining mao nga bidding maoy mogasto sa pagtukod og bag-ong terminal building ug mopanindot sa karaang terminal building, dayon sila maoy modumala sulod sa 25 ka tuig.

Giawhag sa Filinvest-Changi ang mga sakop sa BAC nga susihon ang kwestyonable nga pagdumala sa GMR sa mga airport sa New Delhi ug Maldives, India aron maoy basihan kun angay ba nga kini ang tugyanan sa pagtukod sa ikaduha nga labing daku nga terminal building sa nasud. (BANAT NEWS)