IBP mohimo’g protesta pagpatay ni Archival

CEBU, Philippines - Naglaraw karon ang Integrated Bar of the PHilippines (IBP) nga mopahigayon og protesta sa tibuok nasud aron pagpangayo’g hustisya sa pag-ambus patay ni Atty. Noel Archival.

Si Archival gipatay uban sa duha niya ka kauban dihang ang gisakyan nila nga sakyanan girakrakan og mga bala sa wala pa hiilhi nga mga armadong tawo didto sa Barangay Coro, Dalaguete sa miaging semana.

Si  Manlalaban Mae Elaine Bathan, presidente sa IBP Cebu Chapter, miingon nga si IBP national president Vicente Joyas maoy nagplano sa pagpahigyon og nasudnong protesta nga salmotan sa mga abogado aron awhagon ang kapolisan nga dalion pagsulbad ang krimen.

Nasagmuyo ang mga kaubang abogado ni Archival nga hangtod karon wala pay tukma ug lig-on nga kalamboan sa imbestigasyon nga nakab-ot ang kapolisan.

Matud ni Bathan nga ang nasudnong presidente sa IBP nagpakabana g’yud nga kahatagan dayon og sulbad ang pagpatay ni Archival.

Ang gipatay nga abogado igsoon ni Cebu City Councilor Nestor Archival. Ang gipatay nga abogado gihulagway sa iyang mga kauban nga siaw ug makalingaw.  (/RUB)(BANAT NEWS)