Babaye ra’y hinungdan

CEBU, Philippines - Kritikal ang kahimtang sa usa ka tawo nga gipusil kay gipangabubhoan sa suspetsado nga nasuko kay gipanguyaban sa biktima ang babaye nga iyang uyab.

Nahitabo ang pagpamusil didto sa Sitio Lower Malibu, Barangay Subangdaku, dakbayan sa Mandaue kaniadtong Biyernes sa hapon.

Ang report sa kapolisan nga si Gregorio Alejandro, 45, nagpuyo sa Barangay Subangdaku samtang ang nagpusil kaniya nga si Joey Niez, 31, nagpuyo sa Barangay Looc, dakbayan sa Mandaue.

Matud ni SPO1 Michael Limalima sa kapolisan sa Presinto 2 sa Mandaue City Police Office (MCPO) nga masuk-anon kaayo si Niez nga miadto sa balay ni Alejandro ug nangutana kun nganong gipanguyaban niini ang iyang hinigugma.

Ang polis miingon nga nahitabo ang mainitong lantugi sa duha ug si Niez wala na makaagwanta ug nagdali  kini pagbiya sa maong dapit.

Wala dangti’g dugay si Niez kalit nga nibalik nga nagdala na’g armas ug dayong pusil sa ulo sa biktima. Human og pusil nagdali kini sa pagsibat pahilayo.

Matud pa ni SPO1 Limalima nga ang biktima gidala pagdali sa ospital ug gihimo karon sa kapolisan sa pagdakop sa maong suspetsado.  (BANAT NEWS)