Mga residente mireklamo sa barikada sa polis

CEBU, Philippines - Mga residente  sa Sitio Molave, Barangay Tabunok, dakbayan sa Talisay nangreklamo tungod sa gibutang sa kapolisan nga barikada ilawom sa flyover nga nakasamok sa ilang agianan.

Ang mga residente miawhag ni Konsehal Danny Caballero kinsa maoy chairman sa kahusay ug kalinaw sa konseho sa siyudad nga hatagan og pagtagad ang maong problema.

Ang mga residente misuwat kang Caballero nga ang maong pagbutang og ali sa kapolisan sa nahisgutang lugar wala ikonsulta kanila ug nabalaka silang makapalangay kini sa mga emergency vehicles kun dunay emerhensiya sa ilang dapit.

Matud nila nga layo na kaayo og huot sa trapiko kung adto pa sila moliyok ngadto sa Cebu-Toledo Wharf Road inay sa naandan nilang lutsanan.

Gawas niini ang ubang mga residente sa lugar nga dunay sakyanan anha na mo U-turn sa may tiilan sa flyover nga risgo sa mga motorista ug nakalapas kini sa lagda sa trapiko tungod kay solid lane ang maong dalan.

Ang maong mga residente mihangyo kang Caballero nga tangtangon ang ali nga gibutang sa mga polis ug did-an ang mga sakyanan nga maka U-Turn sa maong lugar ug did-an ang mga jeep pasaheroan nga magpakanaog ug magpasakay og mga pasahero aron dili maghuot ang lugar.

Si Caballero nga nahinabi sa Banat News nagkanayon nga personal niyang susihon ang maong lugar aron estoryahon ang mga residente ug sa hepe sa kapolisan sa siyudad nga si Superintendent Resty Santos.

Si Santos nga nahinabi sa Banat News  miingon nga anaa ang ilang sub-station sa maong dapit ug gitugotan nila ang mga residente sa Molave nga maka-U-Turn aron sila makasud.

Giklaro ni Santos nga tumong lang niya ang “safety” sa publiko ug aron usab mahawan ang nahisgutang lugar nga gipundohan na og mga ambulant vendors ug mga magkaromata.

Karong dunay reklamo, iyaha na lang ipatangtang ang barikada.(/EIM)(BANAT NEWS)