Nangamatay sa kanal gitabangan ni JVR

CEBU, Philippines - Ang pamilya sa manag-agaw nga namatay human mahilo sa methane gas ug nalumos sa kanal diha sa merkado sa Tabunok sa dakbayan sa Talisay nakadawat kagahapon og hinabang gikan sa kagamhanan sa dakbayan sa Talisay.

Si Talisay City Public Information Officer (PIO) Vincie Monterde mibutyag sa Banat News nga gihatagan sa siyudad og libreng lungon ug luna nga ilang kalubngan ang mga namatay nga sila si Brendon ug Romeo Cabanes.

Si Mayor Johnny De los Reyes mipagawas sa iyang personal nga kwarta ug mihatag og tag P5,000 matag pamilya sa duha.

Gisaaran usab sa mayor ang asawa ni Brendon ug igsuon ni Romeo nga patrabahoon ubos sa quota sa mayor.

Si Monterde nagkanayon nga sa iyang pakisusi sa engineering office nasayran nga nanghipos sa ilang mga gamit ang duha kay nahuman na ang ilang paglimpyo.

Sayo nianang adlawa, migamit  og compressor ang duha aron makaginhawa sa ilawom apan gihipos nila kini maong wala nay preskong hanging nahanggab sa ilawom si Brendon ug nahilo. Si Romeo daling mitabang sa ig-agaw apan nadakin-as kini ug naugbok sa ilawom ug nakuyapan ug nadayonan og kalumos.

Matud ni Monterde nga ang grupo sa mga biktima eksperto na kaayo sa maong matang sa trabaho apan wa damhang mahitabo ang nahisgutang disgrasya.

Gimando na sa mayor sa kabomberohan sa siyudad nga bombahan og tubig ang kanal aron mahawan na gyud kini ug dili na mobara.

Ang duha nila ka kauban nga sila si Wilson Campo ug Lemuel Macaraya nga daling mibitik og pisi sa mga biktima apan ang  duha nangalipong usab sa baho ug gidala ngadto sa tambalanan. Si Macaraya ug Campo ang migawas usab dayon gikan sa tambalanan. (/EIM)(BANAT NEWS)