Mga pantalan gibantayan

CEBU, Philippines - Gialerto na ang kapolisan sa tibuok lalawigan sa Sugbo lakip na ang mga pantalan aron masiguro nga dili makagawas ang mga sakyanan nga gigamit sa mga mamumuno sa pagbanhig ni Atty. Noel Archival.

Sumala pa ni Supt. Renato Malazarte ang tigpamaba sa Special Investigation Task Group alang sa kasulbaran sa kamatayon sa abogado ug sa iyang duha ka office aide nga nakasiguro sila nga wala pa makagawas sa lalawigan ang maong mga sakyanan.

Dugang ni Malazarte nga 80% na sila sa pag-ila sa mga responsable sa maong krimen.

Duna nay cartographic sketch ang kapolisan sa tawong giingong nagsunod-sunod sa mga biktima diha sa sud sa korte sa Dumaguete City diin gikan sila Archival nianang adlawa sa wala pa sila gi-ambus pagkahapon sa Dalaguete.

Kagahapong adlawa gisumiter na ang mga cell phone ni Archival ug sa iyang mga aides ngadto sa Digital Forensic Laboratory of the Anti-Cyber Crime Group-7 alang sa digital forensic examination.

Tumong sa maong pakisusi nga mahiling ang tanang mga text messages ug mga tawag sa wala pa banhigi sila si Archival, Edu Miñoza ug Alejandro Jaime sa barangay Coro sa Dalaguete niadtong Martes sa hapon. “We have to check on incoming calls and text messages basin nay threats nga posibleng mahimo natong ebidensiya sa kaso,” sumala pa ni Malazarte. Matud pa ni Sr. Insp. Michael Virtudazo, hepe sa digital forensic laboratory, nga makuha na nila ang mga data sa cell phone sa tulo sulod sa tulo ka adlaw.

Ang tanang sakop sa task group gitahasan sa pagsusi sa mga lugar nga giadtoan sa mga biktima sa wala pa mahitabo ang pagbanhig gikan sa Dumaguete hangtod sa Dalaguete.

Ang hepe sa Police Regional Office 7, Chief Supt. Danilo Constantino miingon nga gusto man nila nga paspasan gyud ang imbestigasyon apan kinahanglan nga mangita una sila og saksi ug lig-on nga ebidensya aron mapasakaan og kaso ang mga responsabli sa maong hitabo. (/EIM)(BANAT NEWS)