Batang gun-for hire sikop

CEBU, Philippines - Nasikop sa kapolisan ang duha ka lalaki lakip na ang usa ka menor de edad nga gitudlong miyembro sa usa ka grupo sa gun for hire pasado alas-5 sa miaging hapon nga naglublob diha sa sitio Villagonzalo II sa barangay Tejero sa dakbayan sa Sugbo.

Ang nasikop naila nga sila si Sigfredo Gagani, 39, ug si Mario (di tinuod nga ngalan), 17, molupyo sa nahisgutan nga lugar.

Napulo ka mga armas uban sa mga bala ang nasakmit ug ang hepe sa City Intelligence Branch, Chief Insp. Romeo Santander nga nahinabi sa mga tigbalita miingon nga ang maong operasyon gilangkoban sa Homicide Section ug sa Special Weapons and Tactics.

Sumala pa nga nakadawat siya og taho pinaagi sa text nga ang suspetsado sa pagpusil patay kang Jerry Soco Tapales, waiter niadtong Pebrero 13 ning tuiga naa magtago sa maong lugar.

Nahadlok ang maong texter nga sila na pud unya ang pusilon sa maong mga tawo nga mao ang duha ka dinakpan.

Sumala pa ni Santander nga nakuhaan og usa ka .45 nga pistola si Mario, usa ka magazine nga may sulod nga lima ka bala samtang si Gagani nakuhaan sab og .45 kalibre nga pistola  nga may  magazine ug lima ka bala.

Sumala pa ni Santander nga dihang naabot na sila dapit sa balay ni Harold Dequitos kinsa maoy gitudlo nga lider sa grupo nakit-an nila kini nga nanglimpyo sa iyang armas.

Apan nakabantay kini ug dali kaayong nakadagan agi sa luyo nga pultahan sa iyang balay ug nakaeskapo.

Nakuha gikan sa balay ni Dequitos ang usa ka hand grenade, shotgun, KG9,  usa ka Frontier revolver, duha ka .38 revolvers, Magnum .22 caliber revolver, usa ka .9mm ARMSCOR pistol , usa ka Magnum .357 revolver ug mga magazines nga dunay mga bala.

Si Dequitos napriso na kaniadto sa kaso nga may kalambigitan sa illegal drugs ug bag-o lang kini nakagawas sa prisohan human nakapiyansa.

Matud pang Santander nga si Dequitos nalambigit na sa pipila ka pagpamusil sa dakbayan ug karon nagsugod na og recruit og mga bata-bata.

Sa pagkasikop sa duha miingon si Santander nga masulbad na unya ang pipila ka insidente sa pagpamusil sa dakbayan.

Gipaubos sa ballistics examination ang mga armas nga nakuha sa maong operasyon. (/EIM)(BANAT NEWS)