Kapolisan may ‘lead’ na sa pag-ambush ni Archival

CEBU, Philippines - Duna nay lead ang kapolisan sa pagpamanhig sa abogadong si Noel Archival ug sa iyang mga sakop, kini maoy gipahibalo sa tigpamaba sa Task Force Archival, Supt. Renato Malazarte.

Si Malazarte miingon nga duna na sila’y gitutokan nga kaso nga gilabanan sa abogado kaniadto nga posibleng maoy nagpaluyo sa kamatayon niini ug sa iyang mga kauban.

Matud pa ni Malazarte nga duha ka mga sakyanan ang nakuha sa cctv camera apan wala niini gibutyag kun diin dapita makuhai ang maong sakyanan kay padayon pa ang ilang imbestigasyon.

Miingon si Malazarte nga usa ka pick-up ang mi-overtake sa SUV ni Archival ug bisan unsaon nila og overtake sigehan sila og sirado niini  samtang ang laing pickup mipwesto sa luyo kalit nga mitupad kanila ug girakrakan sila sa mga sakay niini.

Si Malazarte miingon nga ang maong kasayoran gikan mismo ni Paulo Cortes nga bugtong naluwas sa maong pagpamanhig.

Dugang ni Malazarte nga nakabantay si Cortez nga dunay usa ka tawo nga nagsunod-sunod kanila samtang didto pa sila sa korte sa Dumaguete City.

Miingon siya nga “well-organized” ang maong pagpamanhig ug posible nga binuhatan kini sa mga professional killers.

Dugang ni Malazarte nga posibleng dunay kontak sa Dumaguete City ug sa Cebu ang maong mga gikatahapan ug sa ilang plano, diha gyud himuon ang pag-ambush sa abogado pag-abot sa Coro, Dalaguete. “Kung gusto pa lang unta sila sa Santander pa lang daan ila nang tirahan, nagsakay ra gud ni og sikad si attorney (Archival),” matud pa ni Malazarte.

Dugang ni Malazarte nga nagtuo sila nga ang mga sakyanan nga gigamit sa pagpamanhig ania pa sa Sugbo apan di na sila makasiguro kun naa pa ba gihapon dinhi ang mga killers.  (BANAT NEWS)