Lima ka tawo nadakpan sa drug den
CEBU, Philippines - Nasikop sa mga sakop sa Philippine Drug Enforcement Agency 7 ang lima ka tawo lakip na ang gipasanginlang street pusher diha sa usa ka gidudahang drug den sa dalan Urgello sa dakbayan sa Sugbo sa miaging Martes sa alas 6 sa gabii. Ang nasikop naila nga sila si Joseph Tenchavez, 40, iyang igsuon nga si Rachel, 38, Aldo Rey Alilin nga usa ka architect; Alvin de Jesus, kanhi college instructor ug ang realtor nga si Luis Ramon Torralba.
Nakadawat og tip ang PDEA 7 nga dunay nagsuyop sa drug den nga gipanag-iya sa mga Tenchavez hinungdan sa paglusad nila og buybust operation batok sa duha.
Ang magsuong Tenchavez maoy giingong tigsuplay og illegal drugs sa mga tinun-an sa maong dapit ug makadaghan na kining gireklamo.
Nakasulod sa kwarto nga gihimong drug den ang mga ahente sa PDEA kay nagpakaaron ingnon sila nga manuyopay.
Diha sa sud sa maong lawak ang tulo ka lain pang dinakpan.
Human matunol ang gipalit nilang ‘shabu’ daling gisikop sa PDEA ang managsuong Tenchavez lakip sila si De Jesus, Torralba ug Alilin.
Ang lima gipaubos gilayon sa usa ka drug test apan giingong mibalibad si Toralba. (BANAT NEWS)
- Latest
