Nagsakay og traysikad gibirahan patay

CEBU, Philippines - Patay ang usa ka 47-anyos nga lalaki human kini pusila sa wala mailhing tawong nagsakay og motorsiklo niadtong Miyerkules sa gabii diha sa Sitio Kimba, Barangay Cansojong, dakbayan sa Talisay.

Ang biktima mao si Narciso Valdez Echavez, residente diha sa barangay San Isidro, Talisay.

Si Echavez nakaangkon kini og samad pinusilan sa dughan ug tiyan ug patay na pag-abot sa Talisay City District Hospital.

Sakay sa usa ka traysikad ang biktima padung sa barangay Tanke dihang kalit nga mibutho ang usa ka lalaking nagmotor ug diretsong mipusil sa biktima. Gisusi pa sa kapolisan ang background sa biktima. (BANAT NEWS)