Kahera gitanggong og tulo ka oras

CEBU, Philippines - Gitanggong sa kasilyas sud sa tulo ka oras ang kahera sa usa ka travel agency sa barangay Maguikay dakbayan sa Mandaue nga gitulis sa nagbinugtong nga armadong lalaki alas- 3 pasado ang takna sa milabay’ng hapon.

Nakuha sa  tulisan ang P100,000 cash, tulo ka laptop ug usa ka cellphone.

Ang biktima mao si Ludette Therese Alves, 57, taga Purok Nara, barangay Tayud lungsod sa Liloan kinsa maoy kahera sa Explore Cebu Tours and Travel nga nahimutang sa dalan M.L. Quezon sa barangay Maguikay.

Way gwardiya ang maong establisamento maong yanong nakasulod ang tulisan nga wala magtangtang sa iyang helmet nga diretsong mition kaniya og armas,  mideklarar og tulis ug gipasud siya sa kasilyas ug gitrangkahan.

Matud pang SPO4  Fernando Gabutero sa kapolisan sa Presinto 4 sa Mandaue City Police Office (MCPO) alas -6 pasado na sa gabii nakagawas ang biktima gikan sa kasilyas pinaagi sa pagguba sa pultahan niini. Human masigurong wa na diha ang tulisan daling misumbong sa kapolisan si Alves.  (BANAT NEWS)