Bus operators nagtUo nga minus ang aksidente kUn mga drayber bansay

CEBU, Philippines - Ang mga tag-iya og passenger bus sa dakbayan sa Sugbo ug Mandaue malipay kun estriktohon sa kagamhanan ang paghimo’g kampanya aron dili na tugotan nga makamaneho og sakyanan ang badlongon ug kuwang sa kahibalo nga mga drayber.

Si Julito Flores, presidente sa Cebu South Mini-Bus Operators Association, miingon nga pinaagi sa pag-estrikto sa Land Transportation Franchising and Regulatory Board (LTFRB) ug Land Transportation Office (LTO) mahimo nga masiguro ang kaluwasan sa mga pasahero.

Ang pagpatuman og estrikto nga lakang ngadto sa mga drayber gihangop usab ni Romeo Armamento, ang presidente sa Mandaue United Driver’s Association-National Confederation of Transport-Workers Alliance (MUDA-NCTA).

Matud ni Armamento nga ang iyang grupo nahinangop kaayo sa gilaraw nga ipatuman sa LTFRB ug LTO kay gitumong man kini alang sa paghapsay sa kadalanan.

Naglaum si Armamento ug Flores nga magtinabangay unta ang kadagkoan sa mga ahensya sa kagamhanan alang sa katumanan sa mao nga proyekto.

Gusto pa gani ni Flores nga apilon usab sa pagpasalmot og training sa LTFRB ang mga drivers sa mga sakyanan sa kagamhanan.

Si Flores miingon nga dili lang ang mga pribadong bus ang nadisgrasya nga nikalas og ubay-ubay nga kinabuhi kun dili apil na usab ang mga sakyanan sa gobiyerno.

Usa ka trak de karga nga gipanag-iya sa kagamhanan nabalintong kaniadto samtang gisakyan og mga tawo nga maghatud unta og minatay ngadto sa menteryo human mawad-i og preno. (BANAT NEWS)