Namaligya’g shabu naaktohan sa polis

CEBU, Philippines - Usa ka lalaki ang gidakop sa usa ka polis human naaktohang nibaligya og shabu sa wala mailhing kalalakin-an samtang ang polis nipalit og pagkaon diha sa Purok Molave, barangay Tayud, Liloan sa miaging gabii.

Ang nadakpan mao si Cleve Pilapil, 27 anyos, walay trabaho nga nagpuyo sa maong dapit samtang ang nakadakop kaniya mao si SPO3 Marlon Irog-Irog sakop sa kapolisan sa lungsod sa Liloan.

Si PO3 Jesson Gayo, Liloan Police Station mibutyag sa Banat News nga nagpalit og barbecue sa maong dapit si  Irog-Irog ug samtang nagpaabot sa pagluto niini, nakamatikod siya kang Pilapil nga giduol og wala mailhing mga lalaki.

Matud pa nga kadudahan kaayo ang lihok sa suspek ug sa maong mga lalaki dihang dunay gitunol si Pilapil.

Tungod niini, giduol kini ni Irog-Irog apan nanagan ang mga lalaki apan gidemalas si Pilapil kay iyang nakuptan.

Sa pagrekisa kaniya, nakuhaan kini og 18 ka paketeng may sud nga gidudahang shabu.

Si Pilapil pasakaan og kasong kalapasan sa Republic  Act 9165 o Comprehensive Dangerous Drugs  Act.  (BANAT NEWS)