Atty. Archival Giambus patay

CEBU, Philippines - Giambus ug gipatay sa mga wala hiilhing tawo sila si manlalaban Noel Archival ug ang duha niya ka “bata-bata,” samtang grabe usab nga nasamdan ang laing usa pa niya ka kauban sa sakyanan.

Gawas ni Archival, ang duha ka laing namatay mao sila si Alejandro Jayme, ang drayber sa Sports Utility Vehicle nga ang plate number YGE-240, ug si Candido Miñoza, nga sulogoon sa abogado.

Ang samaran nga nagpaalim pa karon sa tambalanan mao si Paulo Cortez, 54, taga Nasipit, Talamban nga suod nga higala ni Archival.

Silang upat luwan sa SUV ug nagpaingon na unta sa dakbayan sa Sugbo gikan nga mitambong og husay sa kaso didto sa dakbayan sa Dumaguete, Negros Oriental.

Nahibaw-an nga si Archival usa sa mga abogado sa kaso nga robbery nga gihusay kagahapon didto sa sala ni Judge Oliver Repollo sa Regional Trial Court (RTC) Branch 38. Ang mga huwes ug kaubanang abogado ni Archival dinhi sa Sugbo nakurat kaayo pagkasayod nga gi-ambush ang manghod ni Cebu City Councilor Nestor Archival.

Matud ni Konsehal Archival nga si Atty. Archival nakakontak pa sa iyang office secretary mga ala una sa hapon ug mipahibalo nga nagpaingon na sila balik sa dakbayan sa Sugbo. Ang samaron nga si Paulo Cortez mitug-an ngadto sa mga polis nga pag-abot nila sa hilit nga dapit sa Barangay Corro adunay pula nga Hilux nga miampad kanila ug nakabantay usab sila og laing sakyanan nga nagsunod.

Kalit lang mibukas ang bildo sa bentana sa pula nga Hilux ug kalit migimaw ang sumbohan sa armas ug gipangrapido sila sa mga bala sa makadaghan nga higayon. Si Atty. Archival nakaangkon og daghang pinusilan ug gani nabuslot-buslot ang iyang nawong ug agtang. Gituohan nga ang abogado nagkalingaw og basa-basa og mantalaan dihang sila gi-ambush. Didto si Archival maglingkod sa luyo nga lingkoranan. Matud sa kapolisan nga si Archival ug Miñoza maoy namatay “on the spot” sulod sa ilang gisakyan samtang si Jayme ug Cortez gidala sa Vicente Sotto Memorial Medical Center (VSMMC) apan si Jayme namatay ‘sab. Ang mga crime scene investigators mibutyag nga ang sakyanan nga gisakyan sa mga biktima nabulit og 31 ka pinusilan. Ang mga polis sa Dalaguete nakapunit og daghang kabhang sa M16 Armalite rifle nga nagkatag sa dapit nga nahitaboan.

Ang dapit nga nahitaboan sa pagpamanhig gibana-bana nga mga 500 metros ang gilay-on sa Barangay Banhigan.

Ang Barangay Corro nga didto gi-ambush si Atty. Archival mao ang barangay diin ang patay’ng lawas ni Alona Bacolod-Ecleo gilabay kaniadtong 2002.

Si Atty. Archival maoy mibanos nga abogado ni kanhi Kongresista Ruben Ecleo nga nakonbikto sa iyang kalambigitan pagpatay sa iyang asawa nga si Alona. Si Senior Superintendent Noel Gillamac, provincial police director, mimando g’yud dayon sa iyang mga sakop nga dili hunongan ang pag-imbistigar sa maong hitabo.  (BANAT NEWS)