Mayor Rama magpatabang g’yud sa DOH

CEBU, Philippines - Si Mayor Michael Rama mangayo g’yud og usa ka bilyon ka pesos gikan sa nasudnong kagamhanan aron magamit sa pagpatukod og bag-ong Cebu City Medical Center (CCMC).

Matud ni Mayor Rama nga gidapit siya pagpatambong sa pag-review sa pagpreparar sa budget sa mga nasudnong ahensya sa kagamhanan nga ania magbase sa dakbayan sa Sugbo.

Nahibulong ang mayor kay sa giandam nga budget sa Department of Health (DOH) regional office alang sa 2015 wala masukip ang budget sa pagpatukod og bag-ong tambalanan dinhi sa dakbayan.

Ang karaang CCMC building dili na ipagamit sa mayor tungod kay nakasinati kini og dagku nga pagpangliki tungod sa kusog nga pagtay-og sa linog kaniadtong Oktubre 15.

Ang mayor miingon nga tinguha g’yud unta niya nga ang pagatukoron nga bag-ong ospital sa dakbayan kinahanglan nga makadawat og 1,000 ka pasyente.

Ang karaan nga CCMC building makadawat lang og 300 ka pasyente apan tungod sa kadaghan sa mga pasyente, dunay mga katre nga higdaan og duha o tulo.   (BANAT NEWS)