‘Namusil’ sa Gun-ob gibawsan ‘sab pagpusil

CEBU, Philippines - Usa ka tawo nga gikatahapang maoy mipusil sa iyang silingan didto sa Sitio Lemonsito, sakop sa Barangay Gun-ob, dakbayan sa Lapu-Lapu gipusil ‘sab sa uyoan sa biktima.

Si Sandy Familar, 42, minyo nga lumad g’yud nga taga Isla sa Bantayan apan nagpuyo sa Sitio Lemonsito maoy gikatahapan nga mipusil ug miangol ni Gaius Desucatan, 21-anyos niya nga silingan.

Sigun sa imbestigasyon sa kapolisan nga si Desucatan nagtan-aw lang og salida sa telebisyon sulod sa ilang panimalay dihang dunay tawo nga wala niya mailhi ang misaka.

Matud ni Desucatan nga ang tawo nangita sa iyang uyoan nga si Emeliano Prieto, 30, minyo ug nagpuyo gihapon sa mao nga dapit. Dihang giingnan ni Desucatan ang tawo nga wala didto ang iyang gipangita kalit lang siya nga gipusil.

Si Desucatan nga nakaangkon og pinusilan sa wala nga bukton mitug-an sa iyang uyoan nga miabot pagkataud-taud nga siya ang gipangita ug tingali buot patyon sa maong tawo.

Si Prieto nagdali nga misulong sa balay ni Familar nga ila ra’ng silingan ug naabtan kini nga nagtan-aw og salida sa telebisyon. Gipusil ni Prieto si Familar ug nakaangkon kini’g samad sa iyang liog. Ang samaron nga si Familar gidala sa Vicente Sotto Memorial Medical Center (VSMMC)  ug anaa pa sa kritikal nga kahimtang.

Si Prieto dali nga nakasibat sa maong dapit. Nagduda ang kapolisan nga adunay panagbangi sila si Prieto ug Familar.(/RUB)(BANAT NEWS)