Suspek sa carnapping ug pagpamusil nadakpan
CEBU, Philippines - Usa ka ex-convict nga responsable sa nagkadaiyang pagpanulis ug pagpamusil sa Metro Cebu ug sa habagatang Sugbu ang gisikop sa kapulisan sa San Fernando diha sa Barangay Sangat adtong Sabado.
Si Angelito Amance, 18, nasikop sa kapulisan sa iyang pinuy-anan human niya pusila ang usa ka barangay tanod lakip ang duha ka sibilyan sa dihang aduna unta siyay tulison adtong Biyernes sa gabii.
Nakuha sa iyang posesyon ang duha ka gagmay’ng pakete sa shabu, usa ka .38 revolver nga adunay upat ka bala ug duha ka kabhang ug tulo ka cellular phones.
Si Chief Insp. Sarah Jean Recla, San Fernando police chief, nagkanayon nga modus operandi sa suspek ang pagpara og habal-habal ug mohapit sa kaubang giila nga si Barkley Caparida ug ang duha magpahatod sa awaaw nga lugar ug didto nila kini tulison.
Si Caparida matud pa aduna say pending nga kaso sa pagpanulis.
"Notado na gyud ni silang manulisay diha unya identified na gyud ni sila, ang amoa lang ang pag-aresto, karon na-taymingan na gyud," matud ni Recla.
Si Amance napriso kaniadto sa kasong kalapasan sa RA 8294 o illegal possession of firearms apan na-dismiss ang maong kaso human misibog ang reklamante.
Nakagawas ra usab siya niadtong Pebrero 4 ning tuiga ug mibalik na usab sa ilang modus operandi. Gipasanginlan usab si Amance sa kapolisan nga tigamitan og gidiling drugas.
"Posible gyud nang tigamitan ni og shabu unya dili lang kay ngari sa San Fernando moigo hasta pud sa neighboring towns ilabi na ang Carcar," sigon ni Recla.
Ang kapulisan mopasaka og kasong frustrated murder batok kang Amance ug laing kaso sa pagpanulis human adunay upat ka reklamante nga mipatim-aw sa ilang buhatan sukad sa iyang pagkasikop. (/EIM)(BANAT NEWS)
- Latest
