Wa magustuhi nanunggab

CEBU, Philippines - Tungod kay wala mauyuni, usa ka delivery boy ang midunggab sa ig-agaw sa iyang uyab atubangan sa balay niini kagahapon sa buntag diha sa barangay Duljo-Fatima, dakbayan sa Sugbo.

Ang biktima giila nga si Fritz Villamor Arances, 33, stock in charge sa usa ka botika ug molupyo sa maong lugar.

Samtang ang suspetsado naila nga si Joseph Brian Cabase, 18, molupyo sa barangay Agsungot sa dakbayan sa Sugbo.

Base sa imbestigasyon sa kapolisan nasuta nga ang suspetsado ug ang biktima nagkasinumbagay atubangan sa balay niini sa wa pa mahitabo ang pagpanunggab.

Apan tungod kay nalupig, milakaw ang suspetsado apan mibalik kini dayon nga nagdala na og kutsilyo ug naabtan ang biktima nga nanghugas sud sa kasilyas sa gawas sa ilang balay ug gidiretso og dunggab sa makadaghang higayon.

Ang biktima daling gidala sa Adventist Hospital apan gideklarar na kini nga dead on arrival.

Base sa pamahayag sa hinigugma sa suspetsado nga ig-agaw sa biktima nga si Beverly Balindez, way gusto ang namatay sa iyang uyab  kay kanunay kining modiretso lang og sulod sa ilang balay nga dili mananghid.

Ang suspek nadakpan ni SPO1 Jay Ramos sakop sa Special Weapons and Tactics  sa dayon unta niini og ikyas. Narekober sa kapolisan ang usa ka kutsilyo nga 13-pulgadas ang gitas-on nga gituohang maoy gigamit sa krimen.

Samtang gidunggab sa usa ka gidudahang drug user nga si Kevin Macaraya, 19, ang iyang iyaan nga si Saturnina Buchan, 40, niadtong Domingo sa buntag sa Ocampo Drive Extension, sa Inayawan ning dakbayan.

Matud sa biktima nga samtang naglung-ag siya gawas sa ilang balay, kalit na lang mibutho ang iyang pag-umangkon ug gidunggab siya niini sa likod. Ang biktima gidala sa Chong Hua Hospital samtang miikyas ang suspek palayo sa dapit. (Bryner Diaz ug Angelica Bertos, NSU Intern/EIM) (BANAT NEWS)