2 ka ambulansya, speed boats gidonar ngadto sa dakbayan

CEBU, Philippines - Ang kagamhanan sa dakbayan sa Sugbo nakadawat og duha ka ambulansya ug mga speed boats nga gidonar sa usa ka magpapatigayon nga tua magbase sa Estados Unidos.

Gawas sa tulo ka speed boat, duha ka jetski ug duha ka ambulansya, aduna pay pito ka bag-o g’yud nga rubber boats nga gidonar si Oliver Lagare, ang magpapatigayon nga tua sa Massachusets.

Matud ni Mayor Michael Rama nga ang duha ka jetski magamit kaayo kini sa mga sakop sa Bantay Dagat pagpatrolya sa kadagatan aron bantayan nga dili makasulod ang mga illegal nga mangingisda sa teritoryo sa siyudad.

Nahinangop si Rama sa pagdonar ni Lagare sa mao nga kahimanan nga kapahimuslan kaayo pagresponde og mga alarma.

Matud ni Konsehal Dave Tumulak nga ang donasyon nga nagkantidad og subra sa P2 milyones napahigayon pinaagi sa pagtabang sa usa ka Charmaine Ong nga taga dakbayan sa Sugbo.

Si Ong kanunay nga magbalik-balik ngadto sa Estados Unidos aron magpatambal sa iyang sakit nga cancer ug nahigala niya si Lagare nga tag-iya og dakung kompaniya sa Estados Unidos.

Nakumbinsir ni Ong ang langyaw nga si Lagare modonar og kahimanan alang sa dakbayan sa Sugbo.

Gitataw ni Konsehal Tumulak nga bisan og segunda-mano ang duha ka ambulansya, ang tulo ka speed boat ug duha ka jetski apan kapahimuslan pa kini gihapon kay maayo pa nga moandar ang mga makina.   (BANAT NEWS)