Working student kaniadto, negosyante na karon

CEBU, Philippines -  Nagmalampuson sa natad sa negosyo ug sa iyang trabaho isip court stenographer. Mao kini ang nakab-ot ni Anita Quintas, lumad sa nabantog nga “Surfing Capital of Asia” ang isla sa Siargao.

Ang mga Quintas usa na karon sa mga iladong pamilya sa lungsod sa General Luna sa Siargao ug nanag-iya OG labing karaang lodging house ug beach resort sa Siargao nga Jadestar Lodge and Beach Resort  ug ingon man kaugalingong pribadong family resort.

Ang resort gipabarog sa 1,000 square meters nga luna nga ilang napalit ug gibutangan kaniadto og mga nipa cottages. Paglabay sa   katuigan, midaghan ang mga kakompetensya hinungdan nga gi-upgrade nila kini. Ang resort aduna nay walo ka bungalow-type nga cottages nga may aircondition units.   Sa wala pa mosikat ang Siargao sa surfing, ang negosyo sa magtiayong Quintas mao ray nagbarog nga ingon niini sa lungsod sa General Luna.

Ang maong patigayon bunga sa paningkamot sa magtiayong Anita ug Delfin Quintas sukad nga sila naminyo niadtong 1990.

Si Anita usa ka stenographer sa Municipal Circuit Trial  Court (MCTC) sud na sa 24 ka tuig, samtang si Delfin mao karo’y nagdumala sa ilang gamay nga negosyo.

 Nahimo nang routine ni Quintas ang magtrabaho sa korte ug tigluto ug tigsilbi sa mga bisita.  Gumikan kay family business na man nila ang resort, tanang miyembro sa pamilya adunay tahas nga magtinabangay sa pagpalambo niini.

Usa ka dakong hagit nila karon ngadto sa ilang mga anak mao ang pag-atiman niini tungod kay kadaghanan karon sa mga resorts sa ilang lungsod gipanag-iya og mga langyaw nga dunay ikasarang sa kompetisyon.

Edukasyon

 Tungod sa iyang pagkugi ug pagpaningkamot napahuman niya ang iyang mga anak nga usa na ka nurse nga si Dianne Marie Quintas nga nagtrabaho na karon sa usa ka pribadong tambalanan sa Surigao City ug ang tigbalita nga International Justice Mission awardee ug reporter karon sa The Freeman ug Banat News nga si Kristine Quintas, ug ang nag-inusarang anak nga lalaki nga si Mark Joseph Quintas kasamtangang nagtungha sa high school.

Ang magtiayong Quintas naggikan sa ordinaryong pamilya apan nakalingkawas sa kalisod tungod sa paningkamot, nakasabot sila sa kamahinungdanon sa edukasyon.

Katorse ka  anak sa iyang kaparyentihan ang iyang napahuman sa pagtungha ug nakaangkon sa ilang kaugalingong mga diploma.

Kapobre

 Gihulagway sa anak niini nga si Kristine nga ang kinabuhi sa iyang inahan susama sa usa ka dako nga bawod sa sikat nga surfing beaches sa ilang lugar,  maanindot tan-awon ug makaengganyong sakyan, apan dunay dakong hagit sa buot motaak. Si Anita nagdako sa kalisod ug way namat-ang amahan human kini gipatay kaniadto ug nalubong na lang sa limot kung si kinsa ang mga kriminal. Kinamanghuran sa tulo ka managsuon si Anita, apan sa linghod nga pangidaron nakat-on na siya sa pagdawat sa hagit sa kapobrehon.  Grade 1 pa lamang nahimo na siyang working student sa iyang maestra ug naninda og utanon.

“Para makapadayon og eskwela, buntag sayo manggulay ko og kangkong ug mamunit og bayabas tapos akong ibaligya para makapalit ko og papel ug para naa ko’y balon nga 50 sentabos sa tibuok semana. Mao ni ipalit nako sabaw sa binignit kay mahal man ang naay unod. Ang sobra sa akong halin ipalit nako og sud-an sa ila nanay," matud pa sa 50-anyos nga si Anita.

Kalamposan

 Sa pagpaningkamot ug kanunay nga pag-ampo, nahimo siyang top student sukad elementarya hangtud hayskul.

"Since elementary to college working student ako. So pagkagabii na ko moeskuyla. Lisod pero kinahanglan ako magtiis para future sa ako pamilya," sumala ni Anita.

Tuig 1981, nakahuman siya og short courses sama sa tailoring, dress making, cooking ug manicure and pedicure. Sa samang tuig nagtrabaho siya isip chef sa Miranda Family Hospital sa syudad sa Surigao.

Tuig 1984 naka-graduate siya sa kursong secretarial ug duha ka tuig human niini nakahuman usab siya og kursong Commerce major in Accounting.

Sa wa pa siya nakahuman sa kursong accounting nagtrabaho siya isip receptionist ug accounting staff sa usa ka dental clinic sa maong syudad. Tuig1986-1987 nagtrabaho siya sa Philippine Telephone Communications sa Manila.

Niadtong 1990 mibalik siya sa Siargao ug nakatrabaho isip court stenographer, sa mao usab nga tuig siya nakadesider nga magpamilya ug nagsugod og pundar.

"Dedikasyon ug pagsalig sa Ginoo lamang ang akong puhunan. Ang kopobrehon di kini babag aron makuha nato ang pangandoy di lamang sa atong kaugalingon lakip na usab sa uban," matud ni Quintas.  (BANAT NEWS)