Clean Water Act ipatuman sa probinsya

CEBU, Philippines -  Gusto ni Provincial Board Member Thadeo Ouano nga ang mga mayor sa kalungsuran sa Sugbo mopatuman g’yud sa mga lagda sa Clean Water Act aron pagsiguro nga kaprotehean ang panglawas sa katawhan.

Si Ouano nga nagrepresentar sa ika-unom nga distrito sa Sugbo miingon nga katungdanan sa mga mayor ang pagsiguro nga ang katawhan makabaton og limpyo nga tubig nga ilang mainom aron paglikay nga matakboyan sila’g sakit gikan sa tubig nga hugaw. Tsirman si Ouano sa Committee on Environment sa Cebu Provincial Board mao nga misugyot siya og resulosyon nga nag-awhag sa mga opisyal sa kalungsoran nga ipatuman sa hingpit ang lagda sa Republic Act 9275 kon Clean Water Act.

Gisuportahan sa tanang sakop sa hunta probinsiyal ang sugyot ni Ouano kay gitumong kini alang sa kaayohan sa katawhan pinaagi sa pagbutang og mga sanitary protection sa pagbaton og limpiyong tubig nga mainom.

Ubos sa balaod maoy labing gikinahanglan ang pagpahimutang og mga sewerage facilities sa mga water utilities pinaagi sa pagsagop sa septage management program ug mga sanitation alternative.

Matud ni Ouano kinahanglan nga kanunay’ng susihon ang tubig nga gisuplay ngadto sa katawhan kun gituman ba sa mga water providers ang gilatid sa balaod.

Si Ouano miingon nga ang maong balaod mahingpit pagpatuman kun molihok usab ang mga ahensiya sa kagamhanan nga maoy gihatagan og katungod alang sa pagpatuman. Kini naglakip sa Department of Health (DOH) ug uban pa.  (BANAT NEWS)