Way farmer’s group dinhi nga smugglers –CDA

CEBU, Philippines -  Gidepensahan sa Cooperative Development Authority (CDA) dinhi sa Central Visayas ang mga farmer’s cooperative dinhi sa Sugbo sa pasangil nga gipanggamit sila sa mga rice smugglers.            Matud ni CDA-7 Assistant Regional Director Cipriana C. Mumar nga dili tinuod ang report nga nalambigit sa smuggling activities dinhi sa Sugbo ang mga farmer’s cooperatives.   Si Mumar miingon nga ang mga farmer’s cooperative sa Sugbo wala mangayo og Certificate of Good Standing, usa sa mga gikinahanglan sa kagamhanan aron makaisyuhan sila og Permit to Import alang sa pagkompra og bugas sa gawas sa nasud.            Dunay mga tabi-tabi nga ang mga farmer’s coop gihimo lang nga pantalya sa pag-smuggle og imported rice nga ipaagi dinhi sa Sugbo.           

Sigun pa ni Mumar nga sa nilabay nga duha ka tuig, ang mga nangayo og Certificate of Good Moral Standing alang sa pag-import og imported rice mao ang mga farmer’s cooperative nga nagbase sa Bohol apan wala kini mahatagi sanglit wala kini tugti sa CDA-Manila.           

Gitataw ni Mumar nga ubay-ubay sa mga farmer’s cooperative sa Sugbo ug Bohol gipatawag sa kaulohan ug gisukit-sukit sa giingong kalambigitan niini sa naghitak nga rice smuggling sa nasud.

Matud ni Mumar nga walay bisan usa ka farmer’s cooperative dinhi sa rehiyon nga namatud-an sa kalambigitan sa mga smugglers kay wala man sila mahatagi og Certificate of Good Moral Standing.

Ang kagamhanan sa lalawigan sa Sugbo mipadala og sulat sa Cebu Development Authority paghatag og katin-awan sa giingon nga kalambigitan sa mga farmer’s cooperative nga may accreditation sa lalawigan. (BANAT NEWS)