Graduation rites himuong simple

CEBU, Philippines - Subling gipahimangnoan sa Department of Education (DepEd) ang mga magtutudlo ug mga ginikanan nga himuong yano ug simple ang graduation sa mga publikong tunghaan dinhi sa lalawigan sa Sugbo ug sa Central Visayas karong Marso ug ang uban sa Abril.

Si DepEd-7 Regional Director Dr. Carmelita Dulangon miingon nga kinahanglang haom ug labing maayo nga yano lang ang pagahimuong graduation rites karong tuiga tungod sa nahitabong mga katalagman sa nakalabay nga tuig.

Matud ni Dulangon nga dili gayod pugson ang kabataan ug mga ginikanan sa pagbayad og dagkong amotan aron dili kini mamahimong babag sa pagpaso sa mogradwar nga kabataan.

Giawhag usab ni Dulangon ang mga ginikanan ug mga magtutudlo nga sa eskuylahan lang ipahigayon ang graduation exercises aron dili mosamot og kadako ang gastohan.

Samtang gipahibawo usab ni Dulangon nga ang ilang buhatan andam kaayo nga modawat sa reklamo sa mga ginikanan.

Ang tigpamaba sa DepEd-7 nga si Dr. Clara Rebecca Falconi miingon nga hayan sa bulan na sa Abril ipahigayon ang graduation sa mga tunghaan nga naapektohan pag-ayo sa katalagman ilabi na sa lalawigan sa Bohol ug sa amihanang bahin sa lalawigan sa Sugbo.

Kini aron makompleto ang 201 school days sa School Year 2013-2014. Usa sa pamaagi aron makaapas sa leksyon ug makompleto ang school days, hasta ang adlaw nga Sabado giklasehan sa public schools. (/EIM)(BANAT NEWS)