Rape suspect napusilan patay
CEBU, Philippines - Patay ang usa ka suspek sa kasong rape nga napusilan sa polis human gikatahong misukol atol nga siya dakpon na unta. Ang namatay naila nga si Danilo Paran, taga Barangay Lanas, dakbayan sa Naga nga napusilan sa dughan.
Sumala pa ni Supt. Brindo Nacario, hepe sa kapolisan sa Naga, nga i-serve unta nila ang warrant of arrest nga gi-isyu ni Regional Trial Court (RTC) Judge Manuel Patalinghug apan gipabuthan ni Paran ang mga polis. Ang mga polis mibawos ug naigo si Paran sa dughan ug patay na kini dihang gidala sa Naga Provincial Hospital.
Narekober sa kapolisan gikan kang Paran ang usa ka kalibre .38 nga revolver nga may tulo ka bala.
Si Paran ang ika-pito nga most wanted nga tawo sa dakbayan sa Naga.
Samtang nasikop sa PIDMB ang duha ka manag-agaw nga wanted sa kaso gihapon nga rape. Ang nadakpan mao sila si Deo Arellano, 28, taga Sitio Zone Kasag, Barangay Kalawisan, Lapu-Lapu City ug Khudairi Ayub, 24, kinsa nasikop sa Sitio Riverside, Nangka, Consolacion kagahapon sa kaadlawon.
Ang duha nasikop pinasikad sa warrant of arrest nga gi-isyu ni kanhi Regional Trial Court (RTC) Judge Gabriel Ingles.
Si Sr. Insp. Wilson Abot miingon nga ang duha nangangkon nga uyab sila sa biktima apan ang biktima miinsister nga gilugos g’yud siya sa duha niadtong menor de edad pa siya. (/EIM)(BANAT NEWS)
- Latest
