Babaye gipatay sa ex-lover

CEBU, Philippines - Usa ka 50-anyos nga babaye giunay pagpatay sa iyang ig-agaw nga gikapuyo niya tungod kay ang biktima nagdumili na nga banhawon nila ang ilang kagahapon atol sa bisperas sa Valentine’s Day.

Si Degelia Dimpas, quality control officer sa usa ka kompaniya sa Barangay Canduman, Mandaue mopauli na unta sa miaging gabii dihang iyang nalantawan nga nagpaabot kaniya si Luis Dimpas Jr., 55, taga Barangay Tayud, Consolacion.

Nasayran nga si Degelia ug Luis manag-agaw apan sila nagkarelasyon ug gani nakaangkon pa og duha ka anak. Walay klaro nga trabaho ang suspek diin gibiyaan ni Degelia kaniadtong Pebrero 8.

Si SPO3 Marcos Noval Jr. sa Investigation Detection and Management Bureau (IDMB) sa kapolisan sa Mandaue miingon wala na makagusto ang biktima kang Luis kay kanunay lang siya nga bun-ogon.

Kaniadtong Pebrero 8 nakulatahan na usab ang biktima maoy rason nga milayas kini ug didto na mipuyo sa balay sa iyang ig-agaw sa Barangay Paknaan.

Ang suspek sayo kaayo nga miadto sa gitrabahoan ni Dimpas ug nag-atang na’ng daan didto sa gawasan sa mga kawani bisan og gabii pa ang tinggawas.

Si Dimpas mosibat unta dihang iyang nabantayan nga nagpaabot kaniya ang iyang kapuyo apan gisugat siya sa suspek nga mihangyo nga sila magsultihanay aron dugtongon pagbalik ang ilang relasyon atol sa bisperas sa Valentine’s Day.

Nangayo usab unta og kwarta kaniya ang suspek. Matud ni SPO3 Noval nga gibalibaran ni Dimpas ang suspek nga wala pa siya makakobra sa iyang suweldo ug dali kini nga mibiya.

Ang suspek nga nagdala diay og armas dali nga mipusil sa buko-buko ni Dimpas ug pagkatumba sa biktima, giusban pa niya sa pagpusil sa ulo.

Matud sa kapolisan nga ang suspek abtik nga misibat human sa pagpusil niya kang Dimpas. Napalgan sa kapolisan didto sa dapit nahitaboan ang usa ka slug sa bala.

Ang kapolisan miadto sa balay sa suspek sa Barangay Tayud, Consolacion apan wala didto ang kriminal.

Hangtod kagahapon sa hapon wala pa madakpi sa mga polis ang suspek apan matud sa kapolisan nga pasakaan gihapon siya’g kaso nga murder bisan og dili pa madakpan.  (/RUB)(BANAT NEWS)