P3.7 milyones nga kantidad sa basketball boards, gikwestyon
CEBU, Philippines - Gikuwestyon sa mga konsehal sa dakbayan sa Sugbo ang paggasto ni Mayor Michael Rama og dul-an sa P4 milyones nga pagpalit og 100 ka basketball boards ug gipanghatag sa wala pa ang eleksyon.
Hangtud karon ang supplier nga mao ang Peter Sportscraft wala pa makadawat og bayad sa gi-deliver nila nga mga basketball boards bisan og kini gihimo kaniadto pa’ng miaging tuig.
Si Andrew Borres, executive assistant sa mayor, miawhag ni Konsehal Margarita “Margot†Osmeña nga himoan unta og lakang sa City Council nga kabayran na ang supplier.
Apan ang mga konsehal nagkauyon nga ang isyu pahimoan pa nila og pagtuon sa mga sakop sa Committee on Sports aron sutaon kun gisubay ba ang tukma nga lagda.
Dunay ordinansa nga ang Cebu City Sports Commission (CCSC) maoy mopatuman sa mga “sports activities†sa dakbayan apan si Edward Jayco, tsirman sa City Sports Commission mitataw nga gikuha kaniya ang mao nga trabaho pagpang-apud-apod sa mga basketball boards.
Si Mayor Rama miisyu og memorandum nga alang sa dinalian nga pagserbisyo ang tanang hangyo sa pagpangayo og basketball boards dumalahon na sa Office of the Mayor.
Kun ang 100 ka basketball board gikontrata og P3.7 milyones, nagpasabot nga mata’g basketball board gipalit sa kantidad nga P37 mil mata’g usa nga gihulagway sa uban nga mahal ra. Basi sa lista sa mga tawo nga mihangyo nga adto kanila ipaagi ang ipanghatag nga basketball boards nasuta nga halos tanan kanila mga alyado sa Team Rama. (BANAT NEWS)
- Latest
