Mga opisyal sa 2GO makigtagbo ni Mayor Sitoy

CEBU, Philippines - Ang kadagkoan sa 2GO Group Inc. makigtagbo ni Cordova Mayor Adelino Sitoy aron pakisayran nganong iapil sila nga pabayron og dakung kantidad sa pagkadaut sa daghang bakhaw nga ang Saint Thomas Aquinas mao man ang gibangga sa barko sa Sulpicio.

Ang pagkalunod sa Saint Thomas Aquinas nga gipanag-iya sa 2GO Group didto sa Lawis Ledge kaniadtong Agosto maoy hinungdan sa pagpanggawas sa daghang asiete kon oil gikan sa makina ug nakapatay sa daghang mga kahoy sa kabaybayonan.

Matud ni Mayor Sitoy nga tungod sa pagkamatay sa daghang mga kahoy nga bakhaw sa kabaybayonan sa iyang lungsod nangamatay ug minihit ang mga isda nga unta makuha sa mga mangingisda sa Cordova.

Apan si Boy Mundo sa 2GO Group-Cebu miingon nga nalunod ang ilang barko tungod kay gibanggaan kini sa Sulpicio Express Siete nga gipanag-iya sa Philippine Span Asia Carrier Corp. Si Mayor Sitoy mipadala na og suwat ngadto sa mga tag-iya sa duha ka barko ug midemanda nga mobayad kini og P126 milyones ngadto sa kagamhanan sa Cordova tungod sa dakung kadaut nga nahimo sa ilang kalikupan nga nakahatag og dakung epekto sa kinabuhi sa mga mag-uuma.

Matud ni Mundo nga wala pa sila makadawat sa suwat gikan ni Mayor Sitoy apan tinguha nila nga makigkita personal sa mayor aron nga hisgotan nila ang mao nga isyu.

Gipasabot ni Mundo nga human g’yud malunod ang ilang barko ug nagsugod na pagpanggawas ang oil, mihimo dayon sila og kalihukan aron kapugngan ang dugang kadaut sa kalikupan.

Si Mundo miingon nga gipahibalo nila kanunay ang kadagkoan sa Environmental Management Bureau (EMB) sa Department of Environment and Natural Resources (DENR) sa ilang mga gihimo aron maminus-minos ang kadaut tungod sa oil spill. (BANAT NEWS)