Namuyo sa citicenter gitagalan na lang og napulo ka adlaw

CEBU, Philippines - Gihatagan na lang og napulo ka adlaw sa kagamhanan sa dakbayan sa Sugbo ang mga illegal settlers sulod sa CitiCenter Commercial Complex sa Barangay Kamagayan ning dakbayan sa Sugbu aron boluntaryo nilang hawanan ug biyaan ang maong lugar. Ang pangulo sa Prevention, Restoration, Order, Beautification and Enhancement (PROBE) team nga si Raquel Arce nagkanayon nga mapugos na gyud sila og guba sa mga illegal structures sa maong edipisyo kun dili kini tangtangon sa mga hingtungdan sulod sa pito ka-adlaw.

Ang PROBE nipadangat og Notice to Vacate sa 12 ka pamilya isip second warning kanila aron mamiya sa lugar o boluntaryong limpyohan ang luna sugod kaniadtong Pebrero 11. Kun dili sila mamahawa human sa pito ka adlaw, hatagan sila og tulo ka adlaw nga extension isip last warning.

“Kung di gihapon sila mobiya, we will be forced to implement the law,” si Arce nagkanayon.

Si Arce miingon nga ilegal ang pagpuyo sa maong lugar  tungod kay nakalapas kini sa Article 694 sa Civil Code (Public Nuisance) ug sa City Ordinance 1481 ingon man kalapasan sa Section 28 sa Republic Act 7279.

Kung dili gyud sila mopahawa, ang mga illegal settlers giawhag nga mokuha og hold order gikan sa opisina sa Mayor o Temporary Restraining Order gikan sa korte.

Kahinumduman nga sa miaging tuig, ang mao nga mga molupyo gihatagan og moratorium sa Konseho sa dakbayan pinaagi sa  pag-aprobar sa usa ka ordinansa nga naghatag sa mga residente og unom ka buwan pagpuyo sa lugar samtang mangita sila og kabalhinan.  (BANAT NEWS)