Traffic problem masinati sa Mandaue

CEBU, Philippines - Ang mga motorista nga magbiyahean sa dakbayan sa Mandaue makasinati og problema sa trapiko kay ang Department of Public Works and Highways (DPWH) mohimo’g pagpangsemento sa ubay-ubay nga mga karsada.

Si DPWH project engineer Roy dela Cruz mipahibalo sa mga opisyal sa Mandaue nga gipatuman nila ang mga road concreting projects sa mga karsada nasyonal sa dakbayan.

Ang pagpahibalo sa DPWH sa mga opisyal sa Mandaue gitumong aron nga makahimo sila og pamaagi nga maminus-minos ang problema sa trapiko samtang magpadayon ang pagsemento.

Matud ni Engr. Dela Cruz nga matag karsada nga aduna sila’y proyekto butangan nila og billboards nga magpahibalo sa publiko kabahin sa petsa pagsugod sa proyekto, petsa sa pagtapos ug ang kantidad.

Apil sa mga karsada nga sementohon sa DPWH mao ang Ouano Avenue; dalan Plaridel; dalan M.L. Quezon; M.C. Briones; Andres Soriano Avenue; A. C. Cortes Avenue ug daghan pa.

Ang paagi sa DPWH mao nga kun magpadayon ang pagsemento sa karsada ang pikas “lane” ra ang ilang paagian sa mga sakyanan mao nga kinahanglan nga ang traffic division angay’ng mopatuman og tukma nga lakang.

Gibutyag ni Dela Cruz nga 24 oras ang ilang pagtrabaho nga maoy hinungdan nga nangayo sila og ayuda sa Traffic Enforcement Agency of Mandaue (TEAM) aron madistinohan og mga traffic enforcer ang mao nga mga karsada.

Matud ni TEAM operations chief Edwin Ermac nga distinohan nila og mga traffic enforcer ang mga dapit nga makagiya sa motorista aron malikayan ang grabeng problema sa trapiko.

Napanglantawan ni Ermac nga ang Ouano Avenue dili kaayo makasinati og suliran sa panaghuot sa sakyanan kay unom ka “lane” ang maong karsada ug ang tulo ka lane nga mahibilin maoy gamiton sa mga sakyanan.

Si Ermac mihangyo sa mga motorista nga mosabot sila sa sitwasyon kay ang tumong sa kagamhanan mao man ang pagpaanindot sa ilang agianan. (BANAT NEWS)