12-anyos nga amang gilugos; suspek sa rape nga lolo sikop

CEBU, Philippines - Usa ka 12-anyos nga dalagitang amang ang mireklamo sa Talisay City Police Station (TCPS) Women and Children Protection Desk (WCPD) human kini giingong gilugos niadtong Sabado sa gabii.

Nadakpan hinuon ang suspek nga si Arnold Delima Cañada, 47, taga barangay Lawaan I, dakbayan sa Talisay nga gidakop sa mga silingan nga sila si Jesriel Para ug Bobby Sol Briones. Sila gitugyan ngadto sa mga polis.

Si PO3 Violeta Godinez mibutyag sa Banat News nga ang biktima mitug-an ngadto sa iyang maguwang sa nahitabo kaniya.

Sa imbestigasyon ni Godinez, ang biktima mibutyag nga gikan siya sa balay sa amiga dihang kalit siyang gibunlot ni Cañada ug gidala ngadto sa usa ka vulcanizing shop ug gigapos, pagkahuman gilugos.

Human sa hitabo, gikatahong gipakita sa suspek ang iyang kumo ug gibaharan kini nga dili magsaba ni bisan kinsa.

Apan ang biktima mitug-an gihapon ngadto sa iyang 16-anyos nga maguwang ug dayon ngadto sa ilang uyoan hinungdan sa pagkasikop sa suspek.

Si Godinez kusganong mihimakak sa pasangil batok kaniya.

Samtang nasikop  usab sa mga sakop sa Criminal Investigation and Detection Group 7 pasado alas 8:00 sa miaging buntag didto sa dakbayan sa Bayugan, Agusan del Sur ang usa ka wanted nga lolo nga gipasanginlan nga milugos sa usa ka special child.

Ang nasikop naila nga si  Edilberto Capoy, 69, molupyo sa nahisgotan nga lugar apan may kaso dinhi sa Mandaue.

Sumala pa ni Chief Insp. Rene Kyamko nga naghatod sila og piniriso ngadto sa Mindanao ug ila na lang gilahos si Capoy sa Agusan.

Matud ni Kyamko nga nakadawat sila og kasayoran nga si Capoy anaa na magtago sa iyang balay sa Bayugan busa ila kining giadto tungod kay duna kini warrant of arrest nga gi-isyu ni RTC Branch 56 Presiding Judge Teresita Galaneda sa dakbayan sa Mandaue tungod sa kaso nga rape.

Si Capoy gipasanginlan nga milugos sa usa ka 19 anyos nga special child sa kasagbotan sa lungsod sa Consolacion.

Apan si Capoy nga nahinabi sa mga tigbalita kusganong mihimakak sa pasangil. (BANAT NEWS)