Lalaki giliog og dunggab sa ‘kawatan’
CEBU, Philippines - Nagpaalim pa sa mga samad dinunggaban ang usa ka lalaki human kini gidunggab sa usa ka gidudahang kawatan nga misud sa ilang balay sa sitio Kagudoy, barangay Basak, dakbayan sa Lapu-Lapu sa milabay’ng hapon.
Ang biktima mao si Angelito Ejes Alolor, 34, residente sa maong dapit. Samtang gitumbok nga suspetsado mao si Mark Dadula Enfanzo, 18, nagpuyo sa sitio Timpolok, barangay Gun-ob sa maong dakbayan.
Sa pasiunang imbestigasyon ni PO3 Luisito Ernie, natulog si Alolor sa ilang sala dihang nakabatyag kini og mga kasikas ug iyang namat-an si Enfanzo nga misaka sa ilang panimalay ug gidudahan niyang mangawat.
Apan dihang gikomprontase niya kini, giingong kalit siya niining gidunggab og icepick.
Si Alolor nahiagom og samad dinunggaban sa iyang liog hinungdan nga gidali kini og dala sa Mactan Doctors Hospital ug ubos pa kini sa obserbasyon sa mga mananambal.
Samtang si Enfanzo dali kining nasikop sa lolo sa biktima ug gidala sa Lapu-Lapu City police detention cell. Apan nasayran nga ang suspek miingon nga duna diay kini tuyo sa iyang amahan nga maoy namintal sa balay sa biktima nianang tungora. (BANAT NEWS)
- Latest
